सर्व विभागप्रमुखांना नागरिकांच्या तक्रारींचे समाधानकारक निराकरण करण्याचे आदेश
पिंपरी-चिंचवड:
पिंपरी-चिंचवड महानगरपालिका नागरिकांच्या समस्या सोडवून त्यांच्या राहणीमानात सुधारणा करण्यासाठी कटिबद्ध आहे. नागरिकांना उत्कृष्ट सेवा प्रदान करून त्यांचे समाधान वाढवण्यासाठी आणि महानगरपालिकेचे उत्तरदायित्व वाढवण्यासाठी 'स्मार्ट सारथी' तक्रार निवारण प्रणालीत सकारात्मक बदल करण्यात आले आहेत. यापुढे या प्रणालीवर आलेल्या प्रत्येक तक्रारीवर समाधानकारक कार्यवाही झाल्यानंतर तक्रारदाराला दूरध्वनीद्वारे संपर्क करून त्यांचा अभिप्राय घेतला जाईल.
तक्रारदाराच्या फीडबॅकच्या आधारे संबंधित विभागाकडून केलेल्या कामाचे मूल्यमापन केले जाणार आहे. तक्रारींच्या प्रभावी निराकरणासाठी सर्व विभागप्रमुखांना वेळेवर आणि समाधानकारक कार्यवाही करण्याचे आदेश देण्यात आले आहेत.
तक्रारींचे निरसन व नागरिकांचा अभिप्राय
महानगरपालिकेने १ नोव्हेंबर ते ९ डिसेंबर २०२४ या कालावधीत 'स्मार्ट सारथी' प्रणालीद्वारे नोंदलेल्या ८,०७६ तक्रारींचे निरसन केले आहे. यापैकी ५,३४९ तक्रारदारांचा दूरध्वनीद्वारे संपर्क साधून अभिप्राय घेतला गेला, ज्यामध्ये ६३ टक्के तक्रारदारांनी समाधान व्यक्त केले, तर ८ टक्के तक्रारदारांनी असमाधान व्यक्त केले आहे. मात्र, २९ टक्के तक्रारदारांनी प्रतिसाद दिला नाही.
तक्रारींचे पुनर्निरीक्षण व कार्यवाही
मागील सहा महिन्यांतील ज्या तक्रारींवर कोणतीही कार्यवाही न करता त्या बंद करण्यात आल्या आहेत, त्या तक्रारदारांनी पुन्हा 'स्मार्ट सारथी' प्रणालीवर तक्रार नोंदवू शकतात. अशा तक्रारी संबंधित वरिष्ठ अधिकारी किंवा विभागप्रमुखांकडे पाठवण्यात येतील. महापालिकेच्या सर्व विभागांनी नागरिकांच्या तक्रारींना गांभीर्याने घेतले पाहिजे, अन्यथा दुर्लक्ष करणाऱ्यांवर चौकशीसह कठोर कारवाई केली जाईल.
तक्रारींचे विश्लेषण व समस्या निवारण
महानगरपालिका नागरिकांकडून येणाऱ्या तक्रारींचे सविस्तर विश्लेषण करणार असून, ज्या भागांमधून जास्त तक्रारी येतात, त्या भागांचा अभ्यास केला जाईल. या विश्लेषणाच्या आधारे सेवा सुधारण्यासाठी आवश्यक ती उपाययोजना केली जाईल.
महानगरपालिकेचे नागरिकांप्रती उत्तरदायित्व
महानगरपालिका आयुक्त तथा प्रशासक शेखर सिंह यांनी नागरिकांच्या तक्रारींना प्राधान्य देऊन त्यांचे समाधानकारक निराकरण करणे हे महापालिकेचे प्रमुख उद्दिष्ट असल्याचे सांगितले. महानगरपालिकेने नागरिकांना दिलेल्या सेवांमुळे त्यांचे समाधान आणि विश्वास वाढेल, अशी अपेक्षा त्यांनी व्यक्त केली.
तक्रारदारांचे समाधान आणि महानगरपालिकेचे कार्यक्षमता वाढवणे हेच महापालिकेचे प्रा
थमिक ध्येय राहणार आहे.
कोणत्याही टिप्पण्‍या नाहीत:
टिप्पणी पोस्ट करा
टीप: केवळ या ब्लॉगचे सदस्य टिप्पणी पोस्ट करू शकतात.